
409ཏི་ཐུང་རྡོ་རྗེ་འཆང་གི་དཀར་ཆག་ངོ་མཚར་དོན་གྱི་སྙིང་པོ་ཡོངས་སུ་རྫོགས་པའི་པད་དཀར་ལྗོན་བཟང་ཞེས་བྱ་བ་བཞུགས་སོ།།
47-6-162
༄༅། །ཏི་ཐུང་རྡོ་རྗེ་འཆང་གི་དཀར་ཆག་ངོ་མཚར་དོན་གྱི་སྙིང་པོ་ཡོངས་སུ་རྫོགས་པའི་པད་དཀར་ལྗོན་བཟང་ཞེས་བྱ་བ་བཞུགས་སོ།།
༄། །མཆོད་བརྗོད་དང་ཆེ་བའི་ཡོན་ཏན་དྲན་པ།
༄༅། །ཏི་ཐུང་རྡོ་རྗེ་འཆང་གི་དཀར་ཆག་ངོ་མཚར་དོན་གྱི་སྙིང་པོ་ཡོངས་སུ་རྫོགས་པའི་པད་དཀར་ལྗོན་བཟང་ཞེས་བྱ་བ་བཞུགས་སོ།།༸རྒྱལ་བ་ཚངས་དབྱངས་རྒྱ་མཚོས་མཛད་པ།ཀ༽ མཆོད་བརྗོད་དང་ཆེ་བའི་ཡོན་ཏན་དྲན་པ།རྨད་བྱུང་མཚན་དཔེའི་དཔལ་འབར་ལོངས་སྤྱོད་རྫོགས། །ཁ་སྦྱོར་བདེ་སྟོང་རོ་ལ་རྟག་རོལ་ཅིང་། །དམིགས་མེད་ཐུགས་རྗེས་ཞི་བའི་མཐའ་སྤངས་པ། །རྒྱལ་བ་ཡན་ལག་བདུན་ལྡན་ལ་ཕྱག་འཚལ། །དེ་ལ་འདིར་བདེ་བར་གཤེགས་པ་རྣམས་ནི་ཐུགས་གཉིས་སུ་མེད་པའི་ཡེ་ཤེས་ཆོས་ཀྱི་སྐུ་དང་། དེ་ལ་རྟོག་པ་མི་མངའ་བ། ཐུགས་བསྐྱེད་སྨོན་ལམ་དང་འགྲོ་བའི་ལེགས་བྱས་དབང་གིས་ཐབས་ཤེས་ཨེ་ཝཾ་མཉམ་པ་ཆེན་པོའི་དོན་གྱི་རོལ་པ་གཟུགས་སྐུར་སྣང་སྟེ། སྐུ་སྟོན་པ། གསུང་བརྗོད་པ། ཐུགས་མཛད་པ། རྒྱུན་མི་འཆད་པ། མངོན་པར་འདུ་བྱེད་མེད་པ། སྐུའི་རྣམ་པ་སྣ་ཚོགས་སུ་སྟོན་པ་སྟེ། ཁྱད་གཞུག་ལྔས་འཇུག་པ་ཡེ་ཤེས་ལྔའི་བདག་ཉིད་ཅན་ཞིང་ཁམས་དག་པ་རྒྱ་མཚོར་གདུལ་བྱ་མཆོག་ལ་ཆོས་ཅན་ཇི་སྙེད་པར་སྣང་བའི་དངོས་པོ་ཐམས་ཅད་ལྷའི་འཁོར་ལོར་གྲུབ་པ་ལོངས་སྤྱོད་
47-6-163
རྫོགས་པའི་སྐུ་དང་། སེམས་ཅན་སྲིད་པ་ལས་སྐྱེ་ནས་མྱང་འདས་ལ་འདུན་པ་དང་། ཐེག་དམན་ལས་བཟློག་ནས་ཐེག་ཆེན་གྱི་སྨོན་པ་བྱེད་པ་དང་། བྱང་ཆུབ་ཏུ་ལུང་སྟོན་པའི་རྣམ་གྲོལ་ཐོབ་པར་བརྗོད་པ་སྟེ། འབྲས་བུ་གསུམ་གྱི་རྒྱུད་བྱེད་ཅིང་རང་བྱུང་ཆེན་པོ་སྤྲུལ་པའི་སྐུ་ནི། ཇི་སྐད་དུ། མདོ་སྡེ་རྒྱན་ལས།རང་བཞིན་ཆོས་རྫོགས་ལོངས་སྤྱོད་དང་། །སྤྲུལ་པ་དག་གིས་ཐ་དད་དུ། །འཇུག་པ་འདི་ནི་སངས་རྒྱས་ཀྱི། །ཆོས་དབྱིངས་རྣམ་པར་དག་པར་བཤད། །ཅེས་དང་། རྒྱུད་བླ་མར། དེ་དབྱེ་ཟབ་དང་རྒྱ་ཆེ་དང་། །བདག་ཉིད་ཆེན་པོ་ཡོན་ཏན་གྱི། །ཆོས་ཀྱི་རབ་དབྱེ་རང་བཞིན་ལ། །སོགས་སོགས་པའི་སྐུ་གསུམ་དག་གིས་འཇུག །ཅེས་དང་། སའི་མདོར།རང་བཞིན་ཆོས་རྫོགས་ལོངས་སྤྱོད་དང་། །སྤྲུལ་པ་ཐ་དད་འཇུག་པ་ཅན། །ཞེས་སོགས་གསུངས་པ་བཞིན་སངས་རྒྱས་ནི་སྐུ་གསུམ་གྱི་བདག་ཉིད་ཅན་འགྲོ་དོན་ལ་གཡེལ་བ་མེད་པའི་མཛད་པ་དང་བཅས་པའི་རང་བཞིན་ཅན་ཏེ། སེམས་ཅན་ཇི་སྙེད་པའི་ཁམས་དང་དབང་པོ་མངོན་པར་མཁྱེན་པའི་ཐུགས། དེ་དང་མཐུན་པར་བསྟན་པའི་སྐུ། དེ་སྙེད་པ་སྨིན་པར་མཛད་པའི་གསུང་སྟེ། མདོར་ན་སྐྱེ་བ་སྤྲུལ་སྐུ་ནི་གང་ལ་གང་གིས་འདུལ་བ་ངན་སོང་གི་རྣམ་པའི་བར་དང་། དེ་བཞིན་དུ་གཟིངས་དང་ཟམ་པ་དང་ཡི་གེ་དང་འདྲ་སྐུ་དང་ལྗོན་ཤིང་ལ་སོགས་པ་ཚད་མེད་པའི་སྣང་བས་འགྲོ་བའི་དོན་བྱེད་དེ། ཕལ་པོ་ཆེར།ས་དང་ཆུ་དང་མེ་དང་རླུང་གིས་ཀྱང་སངས་རྒྱས་བཅོམ་ལྡན་འདས་རྣམས་སེམས་ཅན་ལ་འཕྲིན་ལས་སྒྲུབ་བོ། །ཞེས་དང་། རྒྱུད་བླ་མར།
47-6-164
གདུལ་བྱའི་ཁམས་དང་འདུལ་བའི་ཐབས་དང་ནི། །གདུལ་བྱའི་ཁམས་ཀྱི་འདུལ་བྱའི་བྱ་བ་དང་། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་དང་། ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་དང་། བཀའ་འཁོར་མར་སངས་རྒྱས་མ་བྱོན་པའི་ཞིང་ན་སྐུ་གཟུགས་ཡོད་མ་ཡིན། དེའི་ཕྱིར་གཟུགས་སུ་སྤྲུལ་པ་ཡིན། ཞེས་གསུངས་པ་བཞིན་རང་བྱོན་རྡོ་རྗེ་འཆང་འདི་ཉིད་ཀྱང་གཞན་དུ་མི་བལྟ་ཞིང་། འོན་ཀྱང་བདུད་ཀྱིས་བརླབས་པ་དག་ནི་སངས་རྒྱས་ཉིད་ལ་ཡང་སྐྱོན་གྱི་གོང་བུར་མཐོང་བ་ལེགས་སྐར་གྱི་དཔེ་ལྟ་བུ་དང་། སྣང་བ་དད་པ་ཅན་ནི་རྗེ་བོ་འཕགས་པ་མཐོང་བ་པ་བཞིན་མོས་པ་རང་བཞིན་དག་པ་རྣམས་ལ་རྒྱལ་ཉིད་དང་དབྱེར་མེད་པ་རང་བྱོན་རྡོ་རྗེ་འཆང་འདི་ཉིད་ཀྱི་ལོ་རྒྱུས་བརྗོད་པའི་ཐོག་མར་ཆེ་བའི་ཡོན་ཏན་དྲན་པས་དང་བའི་སྤྲོ་བ་བསྐྱེད་ཅིང་གཏམ་གྱི་འཕྲོས་དོན་ལ་དང་པོ་རང་གིས་གོ་བར་བྱུང་ཚུལ་ལ།
༄། །དང་པོ་རང་གིས་གོ་བར་བྱུང་ཚུལ།
ཁ༽ དང་པོ་རང་གིས་གོ་བར་བྱུང་ཚུལ།སྤྱིར་རྟེན་ཆེན་ནམ་བྱིན་རླབས་ཅན་དུ་གྲགས་པ་ཕལ་ཆེར་ལ་ཁུངས་ཐུབ་ཀྱི་གཏམ་བརྒྱུད་དང་དེབ་ཐེར་སོགས་མཆིས་ཤིང་། བོད་དབུས་ན་རྡོ་བྲག་གི་ངོས་སུ་བྱོན་པའི་སྐུ་གཟུགས། ཡིག་འབྲུ། ཕྱག་ཞབས་ཀྱི་རྗེས་སོགས་ལའང་ལོ་རྒྱུས་ཀྱི་མཚར་གཏམ་རེ་འཆད་རྒྱུ་འདུག་ནའང་། ཕྱོགས་འདིར་དེ་འདྲའི་གླེང་ལབས་དགོན་པས། རྟེན་འདི་ལ་ཡང་ཁུངས་རྩ་རྣལ་མ་བྱུང་བའི་སྤྲོས་པ་མེད་ཀྱང་། རྒན་པ་འགའ་ཞིག་གི་ཁར། སྔར་ནམ་མཁའ་ནས་ཙན་དན་གྱི་སྡོང་པོའི་ཁར་ཕེབས་པ་ཧོར་གྱི་བརྒྱུད་པ་གླུ་སྐྱབས་ཀྱིས་གདན་དྲངས་པ་ད་ལྟའི་སྐུ་
47-6-165
འདྲ་ཆེ་བ་འདིའིང་ནང་དུ་གཞུག་ཏུ་བཞུགས་པ་ཙམ་ལས་མ་ཐོས་པས། རྟེན་ལ་ཡིད་ཆེས་པའི་ལོ་རྒྱུས་ཀྱི་གཏམ་མང་པོ་ཞིག་ཡོད་ན་སྙམ་པ་ཡིད་དུ་འགྲོགས་པའི་སྐབས། གཉུག་མར་རྒྱུན་ཆགས་སུ་རྡོ་རྗེ་འཆང་འདི་གའི་མདུན་དུ་ཆོ་འཕྲུལ་གྱི་ཆུ་དུས་མཆོད་ལོ་རེ་བཞིན།ཐོས་བསམ་དར་རྒྱས་གླིང་དུ་ཡོད་པའི་དགེ་འདུན་རྣམས་ཀྱིས་མཛད་ཀིན་ཡོད་པ། སྤྲེའུ་ཞེས་པ་མེ་ལུག་གི་ལོའི་དུས་སྨོན་གྱི་ཡོན་རང་ནས་སྦྱར། ལྷ་ལྡན་གྱི་སྨོན་ལམ་ཆེན་མོའི་རྗེས་འགྲོར་འོས་པ་བསྐྲུན་པའི་ཚོགས་དབུས་སུ་རང་ཡང་ཕྱིན་ནས་སྨོན་གདབ་གཟབ་ཅིང་།ཚེས་གཉིས་ཀྱི་ནུབ་མོ་མནལ་ལམ་དུ་སོང་མ་སོང་འདྲ་བ་ཞིག་ལ་མདུན་དུ་མི་ནག་སྦོམ་ཐུང་ཁ་མིག་ཤིན་ཏུ་ཆེ་བ། མི་སྡུག་པ་སྐྱ་ཉིལ་ལེ་ཡོད་པ་ཞིག་བྱུང་ནས། ཁྱོད་ཀྱིས་རྡོ་རྗེ་འཆང་འདིའི་རྟེན་གྱི་ལོ་རྒྱུས་རྒྱས་པ་ཞིག་འཆད་དགོས་ཟེར། བདག་གིས་ལོ་རྒྱུས་ལྟ་ཞོག་རྒྱུ་མཚན་ཙམ་ཡང་མི་ཤེས་པས་ཅི་འཆད། ཁྱོད་སུ་ཡིན་གང་ནས་ཡོད་བྱས་པས།བདག་ནི་ཁྱེད་ཀྱི་ཇོ་ཇོ་ཡིན། །གནས་ནི་ནཱ་ལེནྡྲ་རྒྱ་མཚོའི་འགྲམ། །བྲི་ཀ་མ་ལ་ཤཱི་ལའི་གཙུག་ལག་ཁང་། །རྣམ་སྣང་ཐུགས་ཀློང་སོགས་ཡིན། །གཅིག་ཏུ་མ་ངེས། ཁྱོད་ཀྱི་རྗེས་ལ་ཡང་འགྲོ་གིན་ཡོད། ད་ལྟ་ང་རང་འདུག་ས་འདི་ཀ་ཡིན་ཟེར་ནས་མཛུབ་མོ་གུར་མགོན་གྱི་ལྷ་ཁང་གི་ཐེམ་པར་ཀེར་བྱུང་། རང་གི་བསམ་པར་བདག་ལ་འདི་འདྲའི་ཇོ་ཇོ་ནི་མེད་པས། འདི་ནི་གུར་མགོན་ཡིན་ནམ་ཡིན་ན་ཆོས་སྐྱོང་དེ་འདྲ་བ་ལ་འདི་འདྲ་མི་རིགས་མོད། དེ་ལ་འཇིགས་རྔམས་གཟི་བརྗིད་སྐུ་འཁོར་སོགས་བསམ་གྱིས་མི་ཁྱབ་པ་མཆིས་ཏེ། འདི་ནི་ཕུང་ཐུང་མགོ་ཆེ། གཟི་བརྗིད་མེད་པ་ཞིག་འདུག་སྙམ་ནས་ལོ་རྒྱུས་ཁྱོད་ཀྱིས་ཤེས་སམ། ཤེས་ན་ང་ལ་ཤོད་ཅིག་བྱས་པས། ལོས་ཤེས་སང་དགུང་བཤད་པས་ཆོག ཁྱོད་དེ་ལྟར་མ་སེམས་ཤིག་གཟུགས་དངོས་སུ་བསྟན་ན་འཇིགས་སྐྲག་སྐྱེ་
47-6-166
མི་ཡོང་བསམ་པ་ཡིན་ཟེར་མ་ཐག་སྐུ་མདོག་མཐིང་ནག་ཏུ་ཁྲོས་པ། ས་གསུམ་པོ་ཡང་ཤིག་ཤིག་བྱེད་པ་ལྟ་བུ། སྨིན་མ་སྨ་ར་དབུ་སྐྲ་མེ་ལྟར་མཆེད་པ། ཆེ་ཞིང་སྦོམ་པ། འཇིགས་པ་ཉམས་དང་རྔམ་པའི་སྟབས་ཀྱིས་ཕར་ལ་འགྲོ་གྲབ་བྱས་པར། བདག་ཡིད་ཆེས་ཀྱི་དད་པ་ལྷག་པར་གཡོ་ཞིང་། འཇིགས་སྐྲག་གིས་བཟོད་དཀའ་བ་བྱུང་། ཕར་ཕེབས་པའི་དུས་སུ་གུར་མགོན་གྱི་ལྷ་ཁང་འདི་བསྙེལ་རྒྱུ་ཡིན་ནམ་བསམ་པས་ཐག་ཐོགས་མེད་པར་དྲག་པོའི་ངར་སྒྲ་གར་དང་འཆམ་པའི་གོམ་སྟབས་གཅིག་གིས་རྡོ་རྗེ་འཆང་གི་ལྷ་ཁང་ནང་དུ་ཕེབས་ནས་ཅང་མ་གསལ། ཚེས་གསུམ་གྱི་ནུབ་མོ་གཟུགས་མི་མཐོང་བའི་སྒྲ་ཞིག་ལ།
༄། །ཏི་ཐུང་རྡོ་རྗེ་འཆང་གི་ལོ་རྒྱུས།
ག༽ ཏི་ཐུང་རྡོ་རྗེ་འཆང་གི་ལོ་རྒྱུས།རང་བྱུང་ལྔ་ལྡན་དང་ཁྱད་མེད་པ་རྡོ་རྗེ་འཆང་འདི་ཉིད་ཀྱི་ལོ་རྒྱུས་ནི། སྔོན་རྒྱ་གར་འཕགས་པའི་ཡུལ་ན་མཁས་པ་ཆེན་པོ་ཏཻ་ལོ་པ་ཛྙཱ་ན་བྷྲ་ཏྲ་ཞེས་པ་བཞུགས་པ་དེ་ཉིད་ཀྱི་རྟེན་སྐལ་ཡིན་པར་འདུག དེ་ཡང་རྡོ་རྗེ་འཆང་ནི་འཇལ་ལུས་ཆོས་སྐུ་གྲུབ། ཏཻ་ལོོ་པ་ནི་གཞན་བརྟེན་པ་མེད་ཅེས་པའི་མཁས་པ་དེ་ཉིད་ནི་ཐུན་མོང་ཙམ་ལས་དོན་དུ། རྡོ་རྗེ་འཆང་ཉིད་མིའི་ཟློས་གར་གྱི་ཚུལ་དུ་རྣམ་པར་རོལ་པ་ཉིད་དེ། གཞན་ལ་བརྟེན་པ་མེད་པར་རྡོ་རྗེ་འཆང་ཉིད་ལས་ཆོས་མནོས་པས། ཉིན་གཅིག་རྫོགས་པ་ཆེན་པོའི་ཏིང་ངེས་འཛིན་ལ་ཐུགས་མཉམ་པར་བཞག་པའི་ཚེ། ནམ་མཁའ་འོད་ཕུང་འཁྲིགས་པའི་དབུས་ན་ཆོས་ཀྱི་སྒྲ་ཆེན་པོ་ཞིག་བྱུང་བ་གཟིགས་པས། རྡོ་རྗེ་འཆང་སྐུ་མདོག་མཐིང་ག་རིན་ཆེན་རུས་པའི་རྒྱན་སྣ་ཚོགས་འཆང་བ། ཕྱག་གཉིས་ཐུགས་ཀར་བསྣོལ་བས་རྡོར་དྲིལ་བསྣམས་པ། ལོངས་སྤྱོད་རྫོགས་པའི་སྐུའི་ཆ་ལུགས་འཛིན་པའི་སྤྱན་ཧྲིག་གིས་གཟིགས་ནས། རིགས་ཀྱི་བུ།སྟོང་ཉིད་ཆོས་སྐུ་དོན་དམ་སྐྱེ་བ་མེད་ཀྱི། །
47-6-167
འབྱུང་དང་མི་འབྱུང་རང་རིག་ངོ་བོ་ཉིད། །ཆོས་སྐུ་སྟོང་པར་རང་ཤར་རང་གྲོལ་འདི། །སྐྱེ་འཕགས་ཐར་པའི་ལོངས་སྤྱོད་རྫོགས་པ་ཆེ། །ཞེས་གསུངས་པས་མོས་གུས་ལྷག་པར་བཏབ་པས། བུ་ང་འདྲ་བ་ཞིག་བཞེངས་གསུངས་པས། འོད་ལ་ལ་ནི་ཡལ། ལ་ལ་རང་ལ་ཐིམ་ཐིམ་པས་བླ་མ་ལོངས་སྤྱོད་རྫོགས་པའི་སྐུ་དེ་འདྲ་བ་ཞིག་བཞེངས་དགོས་དགོངས་པ་དང་མཉམ་དུ། ནམ་མཁའ་ནས་སྒྲ་ཞིག་ལས་ཀ་མ་ལ་ཤཱི་ལའི་གཙུག་ལག་ཁང་དང་། ཡངས་པ་ཅན་ན་སྐུ་འགྲུབ་པའི་རྒྱུ་ཡོད་པས་ལོངས་ཤིག་ཅེས་པ་བྱུང་མ་ཐག་བྱ་རྐང་གི་བྲི་ཀ་མ་ལ་ཤཱི་ལའི་གཙུག་ལག་ཁང་དུ་ཕེབས་པས་ཛྷཻ་ཀྵིམ་གྱི་སྐུ་གཅིག་བཞུགས་པ་དེས། ང་འདྲ་བ་ཞིག་བཞེངས་གསུངས་པས། སྐུ་རྒྱུ་འདི་འདྲ་ནི་མི་རྙེད་པར་འདུག་པས་མི་འགྲུབ་བོ་ཞེས་པའི་བརྡའ་ཡིན་ནམ་དགོངས་པས།ནམ་མཁའ་ནས་རྡོ་རྗེ་འཆང་གི་སྐུ་རིན་པོ་ཆེ་ཛྷཻ་ཀྵིམ་ལས་གྲུབ་པ་མཐོ་གང་ལ་ཞིག་ཡོད་ལྔ་ལྷང་ངེར་བྱུང་ནས།དེ་ནི་ཁྱོད་ཀྱི་རྟེན་སྐལ་ལོ། །མཐའ་ནི་གདོང་དམར་ཡུལ་དུ་འགྲོ། །ནག་པོའི་ཕྱོགས་ནི་དཀར་བར་བྱེད། །འབྲོག་གི་ཀླུ་ལ་འཆང་བར་བྱེད། །ཞིང་ད་ཆོས་ཀྱིས་འབྱེད་པར་འོང་། །སྲུང་མ་མཧཱ་ཀཱ་ལ་དང་། །ཨེ་ཀ་ཛ་ཏི་སྡེ་བརྒྱད་དོ། །ཞེས་གསུངས་ནས་རྟེན་སྐལ་དུ་གྱུར་པའི་ཐུགས་ཤིན་ཏུ་དགྱེས་ནས་གདན་དྲངས།གསུང་ཡང་ཡང་བྱོན་པ་སོགས་ཀྱི་ལོ་རྒྱུས་དུ་མ་ཡོད་ཟེར། དེ་ནས་ཕྱིས་སུ་དཔལ་ནཱ་རོ་
47-6-168
ལ་རྟེན་སྐལ་དུ་གནང་། ནཱ་རོ་པས་པུ་ལ་ཧ་རིའི་དགོན་པར་གདན་དྲངས་ནས་རྟེན་གྱི་གཙོ་བོར་མཛད་ཅིང་ཡོད་པའི་སྐབས་ཤིག་ཁ་ཆེ་མུ་སྟེགས་པ་རྣམས་ཀྱིས་རྩོད་པའི་འཇིགས་པ་བྱུང་དུས་སུ་ཡང་ནམ་མཁར་འཕགས་ནས་བཞུགས། དེ་ནས་ནཱ་རོ་པའི་སྐུ་དུང་རུས་རྒྱན་བོད་ཀྱི་ལོ་ཙཱ་བ་མར་པས་གདན་འདྲེན་སྐབས་ང་ཡང་འགྲོ་གསུངས་ནས་ལྷོ་བྲོ་བོ་ལུང་དུ་ཕེབས་ནས་བཞུགས། དེ་ནས་ས་སྐྱར་ཕེབས་པ་དང་སླར་ཡང་བྲོ་བོ་ལུང་དུ་ཕེབས་པ་སོགས་ཡིན་ཟེར།
༄། །ཕྱོགས་འདིར་ཇི་ལྟར་ཕེབས་པ།
ང༽ ཕྱོགས་འདིར་ཇི་ལྟར་ཕེབས་པ།ཕྱོགས་འདིར་ཇི་ལྟར་ཕེབས་པ་ནི། འཕན་ནཱ་ལེན་གསུང་ཆོས་རྗེ་བཅོ་བརྒྱད་པས། སྡ་སྐྱ་དང་། བྲོ་བོ་ལུང་སོགས་སུ་གནས་སྐོར་དུ་ཕྱིན་ནས་ཚུར་ཡོང་དུས་བྲོ་བོ་ལུང་ནས་སྐུ་འདི་གདན་དྲངས་ནས་ནཱ་ལེནྡྲར་བཞུགས། དེ་སྐབས་ས་སྐྱ་དང་འབྲི་གུང་གཉིས་ཕན་ཚུན་མཐུ་བྱེད་ཀྱིན་ཡོད་པའི་སྐབས། ཧོར་ཚ་ཧར་རྒྱ་པོ་དབུས་གཙང་ལ་སོང་ནས་བོད་ཐམས་ཅད་མངའ་འོག་ཏུ་བསྡུས་ནས། ཚུར་ཡོང་སྐབས་བྱིན་ཅན་གྱི་རྟེན་མང་པོ་དང་། ནཱ་རོ་པའི་སྐུ་གདུང་། རྡོ་རྗེ་འཆང་གི་སྐུ་འདི་དང་བཅས་གདན་དྲངས་ཏེ་མཚོ་ཁར་སླེབས་པ་དང་། སྐུ་གདུང་རྟེན་རྣམས་དང་ཆབས་ཅིག་སྟབས་བདེ་བས་འཇུ་ལན་བརྒྱུད་ནས་ཡོང་བས་ཁུ་ཁུར་ཐུའི་ལ་ཟུར་སླེབས་སྐབས། སྐུ་གདུང་དང་རྟེན་རྣམས་སྔོན་དུ་སོང་། རྒྱལ་པོ་རང་ཉིད་ཅུང་ཟད་རྗེས་ལ་འགྱངས་ནས་སོང་བས། སྔ་ནས་བོད་ཀྱི་ལྷ་འདྲེ་རྣམས་རྟེན་གྱི་རྗེས་སུ་འབྲངས་ནས་འཕྲུལ་འཚུབ་བྱེད་ཀིན་ཡོད་པས། དེ་སྐབས་འོད་དེ་གུང་རྒྱལ་ལ་སོགས་པའི་ལྷ་འདྲེ་རྣམས་ལའི་ཕར་བརྒྱུད་ནས་སྐུ་གདུང་རྟེན་རྣམས་གངས་ནང་དུ་སྦས་སོང་བས། དེར་བཅོལ་ནས་རྟེན་དྲངས་པའི་དྲེའུ་མིན་པ་གཞན་མ་རྙེད། སྐུ་གདུང་དེ་ནི་ལའི་ཕར་ཕྱོགས་གངས་ནང་
47-6-169
ན་ད་ལྟར་ཡང་བཞུགས། རྡོ་རྗེ་འཆང་གི་སྐུ་འདི་ཉིད་ཞལ་བཞེས་བཞིན་གུར་གྱི་མགོན་པོ་དང་། ཨེ་ཀ་ཙ་ཏི་སྡེ་བརྒྱད་ཀྱི་ཚོགས་དང་བཅས་ཏེ་ནམ་མཁར་བཏེགས་ནས་གདོང་སྣ་དམར་པོའི་སྟེང་ཤུག་སྡོང་ཞིག་གི་ཁར་ཞག་བདུན་བཞུགས།དེ་ནས་གདུལ་བྱ་འདིར་སྨིན་པར་གཟིགས་ནས། ད་ལྟར་གྲོང་གནས་པ་འདིར་དེ་དུས་ཙན་དན་ལ་སོགས་པའི་ནགས་ཚལ་ཆེན་པོ་ཡོད་པའི་ཙན་དན་གྱི་སྡོང་པོ་ཞིག་གི་ཁར་ཕེབས་ནས་བཞུགས་པ་དེར་ཞག་གསུམ་སོང་བའི་ནངས་པར་མི་ཞིག་གིས་མཐོང་ནས་དེར་ཡོད་པའི་དཔོན་ཀླུ་སྐྱབས་ནས་མཚར་བལྟས་སུ་ཡོང་བས་སྡོང་པོའི་སྟེང་འདོམ་ཕྱེད་ཀྱིས་འཕགས་ནས་བཞུགས་ཤིང་འོད་དང་ཟེར་གྱི་ཚོགས་དུ་མ་འཕྲོ་བ་འཇའ་ཚོན་གྱི་འཁོར་ལོ་ཟླུམ་པོ་ཕུབ་བཞིན་ཡོད་པ་མཐོང་ནས། ཁ་སང་ནས་ཕྱོགས་འདིར་འཇའ་འོད་དང་དྲི་བཟང་བྱུང་བ། ཆུ་སྒྲ་བྱུང་བ་སོགས་དང་། རྨི་ལམ་ལའང་ཕུན་ཚོགས་འབྱུང་བ་རྣམས་བརྟགས་ན་འདི་ནི་རང་ཅག་རྣམས་ཀྱི་ལེགས་བྱས་ལས་ཕེབས་པ་མིན་མིན་པའི་ངེས་པ་མེད་པས་ཟེར་ནས་དད་གུས་ཕྱག་མཆོད་མཐའ་ཡས་པ་བྱས། འདབ་ཆགས་རྣམས་མགྲིན་པའི་རྫ་རྔ་འཁྲོལ་བཞིན་བསྐོར་བའི་རྣམ་པར་བརྩོན་པ། མནྡཱ་ར་ཡོངས་ལྷུང་དང་། རོལ་མོའི་སྒྲ་ཡང་བྱུང་།དེ་ནས་དཔོན་ལ་སོགས་པ་རྣམས་ཀྱིས་བགྲོས་ནས། ཇི་ལྟར་ལེན་ཞེས་པས་ལ་ལས་ཤིང་བཅད་ནས་དང་། འཛེག་ནས་དང་། ཕེབས་པར་གསོལ་བ། ཕྲུགས་པ་ལ་སོགས་པས་གདན་འདྲེན་པར་ཁ་འཆམ་པས། གཙོ་བོས་འགོས་ནས་ལེན་ཟེར་ནས་འགོས་པས་ནམ་མཁར་རིང་དུ་བཏེགས་སོང་བ་ན། ཤིང་དེའི་རྩ་བར་མཧཱ་ཀ་ལ་མི་ནག་པོའི་ཚུལ་ཅན་དུ་གནས་ནས་སྨྲས་པ། ཁྱེད་རང་རྣམས་ཀྱིས་མཆོད་ཡུལ་དུ་སྤྱན་འདྲེན་ན་ཁྲི་དང་མཆོད་པ་ལེགས་པར་བཤམས་ལ་གསོལ་བ་ཐོབ་ཅིག་དེས་ན་ཡོང་ཟེར་བ་ལྟར། རྒྱན་ཁྲི་གདུགས།རྒྱལ་མཚན། འཕན། མེ་ཏོག་དང་སྤོས། རོལ་མོའི་བྱེ་བྲག་དང་། རྟེན་ཡོལ་ལ་སོགས་པ་བཟུང་དུ་བཅུག དཔོན་གཉིས་ལ་སོགས་པ་ཐམས་ཅད་ཀྱིས་གསོལ་བ་འུར་བཏབ་པས་
47-6-170
སྐུ་དེ་ཁྲིའི་སྟེང་དུ་འོད་ཀྱི་སྤྲོ་བསྡུ་དང་བཅས་ཏེ་འཚམ་པར་བབས་པས། དགའ་ནས་བྱིན་རླབས་ཞུར་བརྩོན་པ་ན་བཏེགས་སོང་།དེ་ནས་རང་གི་གནས་ཁང་དུ་གདན་འདྲེན་བྱེད་བསམས་ནས། མི་བཞི་རྒྱན་འཆོར་སྤྲོས་པས་ཁྲི་སྐུ་དང་བཅས་འདེགས་རྩོལ་བྱས་པས་མི་ཁྱོག མི་དུ་མས་ཀྱང་ཤེད་དྲིལ་ནས་འདེགས་པས་ལྕི་ཉིས་འགྱུར་དུ་སོང་། དེ་ནས་གསོལ་བ་དྲག་ཏུ་བཏབ་པས་གསུང་བྱོན་ནས།ང་ནི་གྲོང་ཁྱེར་དུ་མི་འགྲོའོ། །དེ་བས་འདུག་ཁང་ཆུང་བ་ཞིག་འདིར་གྱིས་ཤིག་གསུང་བྱུང་བས་ཤིན་ཏུ་དགའ་ནས། དེར་ཚོགས་པ་ཐམས་ཅད་ཀྱིས་འདུན་ཤུགས་གཅིག་གིས་ཉིན་གཅིག་ལ་ཁང་པ་ཆུང་ངུ་ཞིག་བསྐྲུན་པས་གྲུབ་མ་ཐག་ཏུ་འབད་རྩོལ་མེད་པར་རང་བྱོན་གྱིས་ཕེབས་པས། ཀུན་དད་པ་ཕུན་སུམ་ཚོགས་པའི་ཡུལ་ལས་དྲངས་པའི་མོས་གུས་ཆེས་འཕེལ་བ་དང་། དེ་ནས་སྔོན་གྱི་ལེགས་བྱས་དགེ་བའི་སྟོབས་དང་། སྨོན་ལམ་རྣམ་པར་དག་པ་དང་། ལྷའི་བྱིན་རླབས་ཀྱིས་མཚམས་སྦྱོར་བཟང་པོ་ལས་རྡོ་རྗེ་འཆང་དང་གཉིས་སུ་མེད་པའི་བྱིན་རླབས་ཀྱི་གཏེར་དུ་གྲུབ་པའི་སྐུ་བརྙན་རིན་པོ་ཆེ་འདི་ནི། འགྲོ་བ་ཡོངས་ཀྱི་བསོད་ནམས་ཀྱི་ཞིང་དུ། སའི་དགེ་མཚན་དུ་མས་བརྒྱན་པའི་ཡུལ་ལྗོངས་འདིར་གཏན་འཇགས་སུ་བཟུགས་པའི་སྐལ་བ་བཟང་པོ་མངོན་དུ་གྱུར། ཕྱོགས་འདིའི་སྐྱེ་བོ་མཐའ་དག་དགེ་བ་རྣམ་པར་དཀར་བའི་ཆོས་ཀྱི་ཕུང་པོ་བཅུ་ལ་རོལ་བ་ཁོ་ནས་འདའ་བ་བྱུང་། དེའི་རྗེས་འགྲོ་རྒྱུན་ཙམ་མ་ཆད་པ་ད་ལྟའི་བར་དུའང་གྱུར།སྐུ་འདི་ནི་མི་ཐོག་འགའི་རིང་དེ་ལྟར་བཞུགས་པ་ཕྱིས་སུ་བླ་མ་ལྷོ་སྡིངས་པ་ཟེར་བ་ཞིག་གི་དུས། སྔར་གྱི་ཙན་དན་གྱི་སྡོང་པོ་དེས་གདུང་སོགས་བྱས་ཏེ། ད་ལྟའི་གཙུག་ལག་ཁང་ཆེན་པོ་འདི་ཉིད་བསྐྲུན་ནས་རྟེན་གྱི་གཙོ་བོ་རྡོ་རྗེ་འཆང་གི་སྐུ་འདྲ་ཆེ་བ་འདིའི་ནང་གཞུག་ཏུ་རང་བྱོན་རྡོ་རྗེ་འཆང་གི་སྐུ་དེ་ཉིད་སྦས་ཚུལ་དུ་བཞུགས་བཅུག་པ། ད་ལྟ་ཆུ་རྒྱུན་འཛིན་པ་འབྱུང་བ་ལ་སོགས་པ་ནི་འགོགས་པ་མེད་པའི་རང་བཞིན་གྱི་ལྟས་བཟང་
47-6-171
རྨད་དུ་བྱུང་བ་ངོ་མཚར་བའི་གནས་སུ་གྱུར། དེ་ཉིད་ཀྱིས་གཙོ་མཛད་པའི་སྐུ་རྟེན་དེ་ཀའི་གཡས་གཡོན་གཉིས་སུ་འཇམ་དབྱངས་ཕྱག་རྡོར་གཉིས་བཞུགས་པ་སྐུའི་བོང་ཚད་གཙོ་མཚུངས་སུ་འདོམ་ཕྱེད་ཙམ་ཡོད་པ། གཡས་གཡོན་ན་གྲལ་རིམ་བཞིན་ཐུགས་རྗེ་ཆེན་པོ་ནམ་མཁའ་རྒྱལ་པོ་དང་། དཔལ་མོའི་ལུགས་ཉེ་བའི་སྲས་ཆེན་བརྒྱད། མཐའ་རྟེན་ཁྲོ་བོ་རྟ་མགྲིན་ལྕགས་རལ་ཅན། ཆོས་རྒྱལ་གྱི་འདྲ་སྐུ་བཞུགས་པས། ཆོས་རྒྱལ་དེ་ལ་ཡེ་ཤེས་པ་དངོས་སུ་ཞུགས། སྐོར་ལམ་ནང་མའི་རྩིགས་ངོས་ལ་བྲག་རིའི་ཕུག་པ་རྣམས་སུ་མི་ཕམ་མགོན་པོས་གཙོ་བའི་དུས་གསུམ་སངས་རྒྱས། སེངྒེའི་ང་རོ། མི་བསྐྱོད་པ། གཡས་ངོས་ནས་གསང་འདུས་བདེ་མཆོག་འཇིགས་བྱེད་གསུམ་དང་རྣམ་སྣང་འཇམ་རྡོར། དམར་ནག་འཇིགས་གདོང་སོགས་ཐབས་བརྒྱུད་ཀྱི་ལྷ་ཚོགས། གཡོན་ངོས་སུ། སངས་རྒྱས་ཐོད་པ་ཀྱེ་རྡོར་བདག་མེད་མ་སོགས་ཤེས་རབ་བརྒྱད་ཀྱི་ལྷ་ཚོགས། བཀའ་སྡོད་ཆོས་སྐྱོང་སྲུང་མ་ལ་སོགས་པ་དེ་དག་རང་རང་གི་བརྒྱུད་ཁུངས་ཀྱི་བླ་མ་རྣམས་དང་། སྟེང་གི་ཕྱོགས་སུ་བྱང་བུ་རྣམས་སུ་རྒྱལ་དང་རྒྱལ་སྲས་ཞི་ཁྲོའི་རྟེན་བརྟེན་པ་ཇི་སྙེད་བཞུགས་པ་རྣམས་དང་།མདུན་དུ་དུས་གསུམ་སངས་རྒྱས་ཀྱི་བླུགས་སྐུ་གསུམ་བཞུགས་པ་འདི་སྔོན་གྲོ་ཚང་ནས་གདན་འདྲེན་པའི་སྐབས་སུ་རྗེས་ལ་ཕྱོགས་སོགས་འབྲང་བ་དང་། གསུང་བྱོན་པ་སོགས་ཀྱི་ལོ་རྒྱུས་འདུག
༄། །རྟེན་གསུམ་བཞེངས་པའི་ཕན་ཡོན།
ཅ༽ རྟེན་གསུམ་བཞེངས་པའི་ཕན་ཡོན།གསུང་གི་རྟེན་ལ་གསེང་དངུལ་གྱིས་བྲིས་པའི་བཀའ་འགྱུར་ཚར་གཅིག་དང་། མཚལ་བྲིས་བསྟན་འགྱུར་སོགས་བཞུགས། ཕྱོགས་ཀྱི་རྟེན་ལ་ལྷ་ཁང་གི་རྒྱབ་བྱང་མཚམས་སུ་མཆོད་རྟེན་ཆེན་པོ་གཉིས་ལ་སོགས་པའི་སྐུ་གསུང་ཐུགས་རྟེན་བྱིན་རླབས་གྱི་གཟི་བྱིན་
47-6-172
འཕྲོ་བ་བསམ་གྱིས་མི་ཁྱབ་པ་བཞུགས་པ་ནི། ཇི་སྐད་དུ་༸རྒྱལ་དབང་ལྔ་པའི་ལྷ་ལྡན་གྱི་དེབ་ཐེར་དུ།དེ་ལྟར་ངོ་མཚར་རྒྱ་མཚོའི་དགེ་མཚན་ཀུན། །གཅིག་ཏུ་འཁྱིལ་བའི་གཙུག་ལག་ཁང་གི་རྟེན། །བྲིས་འབུར་བྱུང་ཚུལ་སྲིད་ཞུར་བགྱིས་པ་རྣམས། །འཁྲུལ་བ་མེད་པར་གླེང་བ་བརྗོད་དངོས། །ཞེས་གསུངས་པ་བཞིན། གཙུག་ལག་ཁང་ཆེན་པོ་འདི་ཉིད་ཀྱི་རྟེན་རབ་འབྱམས་སོགས་ལ་སྐབས་བབས་བརྗོད་འོས་སྐབས་དང་སྦྱར་ཏེ་སྔར་བརྗོད་པ་རྣམས་ནི། དཔལ་ནག་པོ་ཆེན་པོ་ཡིན་ཁུལ་བས་རྨི་ལམ་འཁྲུལ་སྣང་དུ་བྱ་བ་ཐམས་ཅད་ཚད་མར་རློམ་པ་རི་བོང་ཅལ་འགྲོགས་ཀྱི་དཔེ་མཚུངས་དང་། ལྷ་ཁང་བསྐྲུན་པ་མན་ཆད་ཀྱི་གནས་ཚུལ་རྣམས་གཏམ་བརྒྱུད་མཐོང་བ་དང་བཅས་བརྗོད་པ་བསོད་ནམས་བྱེ་བའི་ཚང་ཚིང་དགའ་ཚལ་ལྷན་ཅིག་རྒོད་པའི་རྟེན་མཆོག་དམ་པ་དེ་ཉིད་ཀྱིས་མཚོན། རྒྱལ་བའི་སྐུ་གཟུགས་གང་ལའང་ལྷག་བསམ་རྣམ་དག་གིས་མཆོད་པ་བགྱིས་པ་དང་། སངས་རྒྱས་དངོས་ལ་མཆོད་པ་བགྱིས་པ་ལ་བསོད་ནམས་ཁྱད་མེད་མཚུངས་པ་ཉིད་དུ་བཤད་དེ། མེ་ཏོག་བརྩེགས་པ་ལས།གང་གིས་བཞུགས་པ་ལ་མཆོད་དང་། །མྱང་ངན་འདས་པའི་སྐུ་གདུང་ལ། །སེམས་ནི་དད་པ་མཉམ་པ་ཡིས། །མཆོད་པའི་བསོད་ནམས་མཉམ་པ་འབྱུང་། །ཞེས་དང་། ཕལ་པོ་ཆེར།སུ་ཞིག་སངས་རྒྱས་ཡུལ་ལ་དད་སེམས་པ། །དེ་ནི་ཆགས་མེད་ཐུབ་པ་ཀུན་གྱིས་དབང་ཡང་བསྐུར། །
47-6-173
ཞེས་གསུངས་པ་བཞིན་གཙུག་ལག་ཁང་འདི་ཉིད་ཀྱི་རྟེན་བརྟེན་པ་ལ། གོས། མར་མེ། བཤོས། མེ་ཏོག ན་བཟའ། སྙན་ཤལ། བདུག་པ། འཕན་གདུགས་སོགས་མཆོད་པའི་རིམ་པ་དང་། ཕྱག་སྐོར་སོགས་ཀྱི་དགེ་བའི་ཕན་ཡོན་ནི། ཀྱེ་བྱེ་བ་ཕྲག་བརྒྱས་བསྐལ་པར་བརྗོད་ཀྱང་བརྗོད་པའི་ཡུལ་ལས་འགོང་ལ། དགེ་བའི་འབྲས་བུ་གནས་སྐབས་སུ་ལྷ་མིའི་དཔལ་འབྱོར་ལ་ལོངས་སྤྱོད་ཅིང་། མཐར་ཐུག་བླ་ན་མེད་པའི་རྫོགས་པའི་བྱང་ཆུབ་ཀྱི་རྒྱུར་འགྱུར་བ་དག་ནི། དགེ་རྩ་ཡོངས་སུ་བསྔོ་བའི་མདོ་དང་། དམ་ཆོས་པད་དཀར་སོགས་དུ་མ་ནས་གསུངས་ཤིང་། དོན་མདོར་བསྡུ་ན་པད་དཀར་ལས།རིང་བསྲེལ་དེ་དག་རྣམ་མང་མཆོད་བྱ་བ། །དེ་དག་ཐམས་ཅད་འཇིག་རྟེན་སངས་རྒྱས་འགྱུར། །ཞེས་དང་། མཆོད་རྟེན་བསྐོར་བའི་ཕན་ཡོན་ལས།མཁས་པ་གང་ཞིག་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་གོམ་པ་གཅིག་བོར་བ། །འཛམ་བུའི་ཆུ་ཀླུང་གསེར་སྲང་འབུམ་ཕྲག་རྙེད། །དེ་ནི་དེ་དང་མཚུངས་པར་ཡོད་མ་ཡིན། །ཞེས་གསེར་སྲང་འབུམ་ཕྲག་རྙེད་པ་ལས་གང་ཞིག་ཕྱག་སྐོར་མཆོད་པའི་ཆེད་དུ་རྐང་པ་འདེགས་འཇོག་གཅིག་གི་བསོད་ནམས་ནི་མཆོག་ཏུ་འགྱུར་ལ། དེ་ཡང་དགེ་བའི་རྩ་བ་གང་དང་གང་འཁོར་གསུམ་ཡོངས་དག་གིས། སེམས་ཅན་ཐམས་ཅད་ལ་ཉི་འོད་ཀྱིས་མུན་པ་སེལ་བ་དང་། ས་ཆེན་པོས་འཇིག་རྟེན་གྱི་ཁམས་འདེགས་པར་འགྲན་པའི་ལྷག་བསམ་རྣམ་དག་གིས་ཡོངས་སུ་འབྲས་བུ་གཟིགས་པ་ཆེན་པོའི་ཡེ་ཤེས་མ་ཐོབ་ཀྱི་བར་ཡོལ་བ་མེད་པ་ནི། བློ་གྲོས་མི་ཟད་པའི་མདོའི་དོན་བཅད་མར་བསྡུས་པ་ན།ཇི་ལྟར་རྒྱ་མཚོའི་ནང་དུ་ཆུ་ཐིགས་ལྷུང་། །
47-6-174
རྒྱ་མཚོ་མ་ཟད་བར་དུ་དེ་མི་འཛད། །ཅེས་བསྔགས་པ་རྒྱ་ཆེར་མཛད་དེ་གསུངས་པ་དང་། ཡུམ་རྒྱན་ལས་ཀྱང་།ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་གསུངས་པ་བཞིན་བསྔོ་བས་རྒྱས་བཏབ་པ་ན་ནམ་ཡང་འཛད་པ་མེད་པའི་ལེགས་ཚོགས་རྨད་དུ་བྱུང་བའི་དཔལ་གྱི་འབྱོར་པ་ཆེན་པོ་འགོགས་པ་མེད་པའི་རང་བཞིན་ཉིད་དོ།།
༄། །མཇུག་གི་རིམ་པ།
ཆ༽ མཇུག་གི་རིམ་པ།འདི་སྨྲས་པ། ཚེ་མ་རིང་ནས་མཆོག་ཏུ་མ་གོམས་པའི། །ས་བོན་མེས་ཚིག་ལྟར་སྣང་རྫུན་སོགས་ཀྱི། །དྲོད་གཤེར་བསྐྱེད་ཀྱང་ལེགས་པའི་ལྗང་ལོའི་འབྲས། །སྨིན་པ་ལྷ་ལམ་པདྨོ་ཁོ་ན་བཞིན། །འོན་ཀྱང་ཕུན་ཚོགས་འབྱུང་གནས་མཆོག་གསུམ་གྱིས། །རིས་སུ་མ་བོར་བྱིན་རླབས་བསིལ་བའི་ཟེར། །གྱིས་ཕྱེ་རིག་པའི་ས་དགའ་འཛུམ་པ་ན། །སྣ་ཚོགས་ཟ་ཟིའི་སྣང་བའི་གེ་སར་བའི། །འཕྲེང་གཡོ་ཆོས་ཉིད་ཉིད་ལས་གཞན་ཅི་ཞིག །ཡིན་ནའང་བདུད་ཀྱིས་བསྒྱུར་ལ་བརྟན་དཀའ་ཕྱིར། །སྙིང་འཁྲུལ་སོམ་ཉིའི་ལམ་ལ་བོར་བ་ན། །ལྷ་ཆེན་དབང་པོའི་འཛུལ་ཞལ་མངོན་པ་ཡིས། །སྤེལ་ཞིག་ཞེས་པ་ལ་བརྟེན་ཀུ་ཀུའི་ཚིལ། །རྨ་ཁར་ཕན་དཔེ་ལྷག་བསམ་ཀྱིས་བྲིས་འདི། །གཞན་དག་ཁྲལ་གད་སྨད་པ་ཉིད་ཟད་ཀྱང་། །འགའ་འགར་དགེ་བའི་ཕན་པར་གྱུར་བ་ན། །དེ་ཡང་བྱང་ཆུབ་དམ་པའི་གཞི་ཞིག་སེམས། །ནོར་འགལ་རང་ནི་ལྷ་ཆེན་གྱིས་གསུངས་ལས། །གོ་ལོག་ནོངས་ཡོད་རྩ་གསུམ་ལྷ་ཚོགས་དང་། །སྟོན་པ་འདི་དང་མཁས་རྣམས་བཟོད་མཛོད་ཀྱི། །ཞེས་ཧོར་གྱི་སའི་ཆ་ཐིས་ཏུང་ངུ་འབོད་
47-6-175
པའི་སའི་ཆར་འཁོད་པའི་སྐལ་བཟང་གདུལ་བྱའི་བསོད་ནམས་རྒྱ་མཚོའི་ཡུལ་ན་མངོན་པར་མཐོང་བའི་རྟེན་མཆོག་རང་བྱོན་ལྔ་ལྡན་མ་རྡོ་རྗེ་འཆང་འདི་ཉིད་ཀྱི་ལོ་རྒྱུས་གོང་དུ་སྨོས་པ་ལྟར་ནག་པོ་ཆེན་པོ་གུར་མགོན་ཡིན་ཁུལ་བས་སྨྲས་པ་སྨོན་ལམ་གྱི་ཚོགས་སུ་བསྒྲགས་པས་ཀུན་གྱིས་ཡེ་གེར་སྤེལ་ན་ཞེས་མོས་པ་དང་། སླར་རྩོམ་པོ་ལའང་བྲིས་ན་ཕན་པ་འབྱུང་ཚུལ་བྱུང་བ་དང་བཅས་ཡོད་པར། ཐོས་བསམ་དར་རྒྱས་གླིང་གི་དཔོན་སློབ་འདུས་པ་སྤྱི་ནས་ཀྱང་རྣམ་ཐར་གྱི་ཡི་གེ་འགོད་པ་དགོས་ཞེས་པའི་བསྐུལ་མའི་མཚམས་སྦྱར་ལ་བརྟེན་ནས། ས་བོན་གྱི་ཡི་གེ་ཞིག་བྲིས་ཟིན་ཀྱང་ཞུས་བྲིས་ལེ་ལོས་འགྱངས་ལུས་སུ་སོང་བ་ཕྱིས་སུ་བྲག་དགོན་བླ་མ་བློ་བཟང་ཚུལ་ཁྲིམས་དང་། གྲོའུ། ཀཱ་རབ་འབྱམས་པ་ཟུང་གིས་སྔ་ཕྱིར་མཛོད་བཏགས་ཆེ་ལེགས་དང་། རྟེན་ཉིད་ཀྱི་མདུན་ནས་མཎྜལ་དང་བཅས་རྗེན་བསྐུལ་བྱུང་བ་བཞིན་ཀུན་དགའི་ལོའི་སྤྲིན་འཇང་ཞེས་པ་ལྔ་པའི་ཏིན་སྤྲང་བཙུན་ངག་དབང་ཆོས་གྲགས་རྒྱ་མཚོ་དཔལ་བཟང་པོས་བགྱིས་པའི་ཡི་གེ་པ་ནི་ངག་དབང་ལྷུན་གྲུབ་དར་རྒྱས་སོ། །འདི་ཡང་རྒྱལ་བསྟན་དང་འགྲོ་བའི་ཕན་བདེ་ཆེར་གྱས་པའི་རྩ་ལག་ཏུ་གྱུར་ཅིག། །།


